《你要識做呢》
婆媳關係對好多人嚟講向來係千古難題，但其實只要個作為中間人嘅阿仔肯美言兩句，成件事會容易好多。
近呢幾年我都盡量少食紅肉，係除咗打邊爐遇著牛柏葉會情難自禁，同埋見到Steak tartare會忍唔到之外，其餘時間可以唔食就唔食。羊肉就不嬲都唔太好，因為九成都會有陣膻味。唯獨奶奶整嘅羊肉我會食，一嚟好味，神奇地唔膻；二嚟老人家咁好心機煮埋畀自己食，還有甚麼好挑剔的。
上星期去咗奶奶屋企食飯，撞正主菜就係羊。瑞典人興復活節食羊，奶奶就問我哋今年復活節有冇食羊呀，程仔突然搶答：「冇呀，佢其他羊唔食，淨係食你煮嘅羊肉㗎咋！」事實的確如此，奶奶聽到之後笑到甜思思咁，心情靚上加靚，馬上叫我食多啲。見到家人咁可愛，我心中都一陣狂喜，爭啲要由餐椅噴射飛上天花板。我哋吃吃晚餐，閒話家常，又過咗一個好愉快嘅晚上。
有啲說話雖然係真，但最好都係由另一半講，否則自己講就好大機會會變咗個好假的肥仔。講出嚟自己會唔好意思，說服力亦唔高。
願天下嘅老公/男朋友能夠都醒水。畢竟當初呢兩個女人就係因為愛你，所以先會走埋一齊呀。間唔中出下手，一人識做，全家受惠。
IG@sis3ter
Search